தமிழ் மொழிக் குடும்பத்தையும் அந்த மொழிகளைப் பேசும் மக்கள் இனத்தையும், அவர்கள் வாழும் நிலத்தையும் குறிக்கும் பழைமையான சொல்லே திராவிடம். உலகின் மூத்த மொழியான தமிழும், அதன் வழி உருவான திராவிட இனமும் காலப் போக்கில் பல்வேறு பண்பாட்டுப் படையெடுப்புகளுக்கு உள்ளாகி, உரிமைகளைப் பறிகொடுத்தது. சமுதாயத்தில் உள்ள படிநிலை ஏற்றத்தாழ்வுகளை அகற்றி, அனைத்து மக்களுக்குமான சமத்துவத்தை வலியுறுத்தும் திராவிடச் சிந்தனை, 20ஆம் நூற்றாண்டின் தொடக்கத்தில் அரசியல் இயக்கமாக உருவெடுத்தது. சமத்துவத்தை அடைவதற்கும், ஏற்றத்தாழ்வைத் தகர்ப்பதற்கும் சமூக நீதி என்ற இலட்சியம் முன்னெடுக்கப்பட்டது.